古事記 ／ 中巻・宇治川の戦いと大山守の死

其王子（宇遲）者。服布衣褌。既爲賤人之形。執檝立船。於是。其兄王。隱伏兵士。衣中服鎧。到於河邊。將乘船時。望其嚴餝之處。以爲弟王坐其吳床。都不知執檝而立船。即問其執檝者曰。傳聞茲山有忿怒之大猪。吾欲取其猪。若獲其猪乎。爾執檝者答曰。不能也。亦問曰。何由。答曰。時時也往往也。雖爲取而不得。是以白不能也。渡到河中之時。令傾其船。墮入水中。爾乃浮出。隨水流下。即流歌曰。知波夜夫流。宇遲能和多理邇。佐袁寻理邇。波夜祁牟比登斯。和賀毛古邇許牟。於是。伏隱河邊之兵。彼廂此廂。一時共興。矢刺而流。故到訶和羅之前而沈入。（訶和羅三字以音）故以鈎探其沈處者。繫其衣中甲而。訶和羅鳴。故號其地謂訶和羅前也。爾掛出其骨之時。弟王歌曰。知波夜比登。宇遲能和多理邇。和多理是邇。多豆流。阿豆佐由美。麻由美。伊岐良牟登。許許呂波母閇杼。伊寻良牟登。許許呂波母閇杼。母登幣波。岐美袁淤母比傳。須惠幣波。伊毛袁淤母比傳。伊良那祁久。曾許爾淤母比傳。加那志祁久。許許爾淤母比傳。伊岐良受曾久流。阿豆佐由美。麻由美。

新字：其王子（宇遅）者。服布衣褌。既為賤人之形。執檝立船。於是。其兄王。隠伏兵士。衣中服鎧。到於河辺。将乗船時。望其厳餝之処。以為弟王坐其呉床。都不知執檝而立船。即問其執檝者曰。伝聞茲山有忿怒之大猪。吾欲取其猪。若獲其猪乎。爾執檝者答曰。不能也。亦問曰。何由。答曰。時時也往往也。雖為取而不得。是以白不能也。渡到河中之時。令傾其船。堕入水中。爾乃浮出。随水流下。即流歌曰。知波夜夫流。宇遅能和多理邇。佐袁寻理邇。波夜祁牟比登斯。和賀毛古邇許牟。於是。伏隠河辺之兵。彼廂此廂。一時共興。矢刺而流。故到訶和羅之前而沈入。（訶和羅三字以音）故以鈎探其沈処者。繋其衣中甲而。訶和羅鳴。故号其地謂訶和羅前也。爾掛出其骨之時。弟王歌曰。知波夜比登。宇遅能和多理邇。和多理是邇。多豆流。阿豆佐由美。麻由美。伊岐良牟登。許許呂波母閇杼。伊寻良牟登。許許呂波母閇杼。母登幣波。岐美袁淤母比伝。須恵幣波。伊毛袁淤母比伝。伊良那祁久。曽許爾淤母比伝。加那志祁久。許許爾淤母比伝。伊岐良受曽久流。阿豆佐由美。麻由美。

書き下し

その王子（宇遅）は、布の衣褌を服て、既に賤しき人の形と為り、楫を執りて船に立ちたまひき。ここにその兄王、兵士を隠し伏せ、衣の中に鎧を服て、河辺に到り、船に乗らむとする時、その厳餝れる処を望みて、弟王の、その呉床に坐すと以為ひて、楫を執りて船に立てるを都て知らず。すなはちその楫を執れる者に問ひて曰く、「伝へ聞く、この山に忿怒れる大猪有りと。吾その猪を取らむと欲ふ。若しその猪を獲むかも」といへば、楫を執れる者答へて曰く、「能はじ」といふ。また問ひて曰く、「何由ぞ」といへば、答へて曰く、「時々や往々や、取らむとすれども得ず。ここを以ちて能はじと白す」といふ。渡りて河中に到る時、その船を傾けしめて、水に堕し入れたまひき。ここにすなはち浮き出で、水の流れのまにまに下りき。すなはち流れつつ歌ひて曰く、「ちはやぶる　宇治の渡に　棹執りに　速けむ人し　我が仲間に来む」。ここに河辺に伏せ隠れたる兵、彼方此方、一時に共に興りて、矢刺して流しき。故、訶和羅の前に到りて沈み入りき。故、鉤を以ちてその沈みし処を探れば、その衣の中の甲に繋かりて、訶和羅と鳴りき。故、その地を号けて訶和羅前と謂ふ。ここにその骨を掛け出す時、弟王歌ひて曰く、「ちはやひと　宇治の渡に　渡り瀬に　立てる　梓弓　檀　い伐らむと　心は思へど　い取らむと　心は思へど　本方は　君を思ひ出　末方は　妹を思ひ出　いらなけく　そこに思ひ出　悲しけく　ここに思ひ出　い伐らずぞ来る　梓弓　檀」。