古事記 ／ 上巻・嫉妬と別れの歌

阿夜爾。那古斐岐許志。夜知富許能。迦微能美許登。許登能。迦多理碁登母。許遠婆。故其夜者不合而。明日夜爲御合也。又其神之嫡后須勢理毘賣命。甚爲嫉妬。故其日子遲神和備豆。（三字以音）自出雲將上坐倭國而。裝束立時。片御手者繫御馬之鞍。片御足蹈入其御鐙而。歌曰。奴婆多麻能。久路岐美祁斯遠。麻都夫佐爾。登理與曾比。淤岐都登理。牟那美流登岐。波多多藝母。許禮婆布佐波受。幣都那美。曾邇奴岐宇豆。蘇邇杼理能。阿遠岐美祁斯遠。麻都夫佐邇。登理與曾比。淤岐都登理。牟那美流登岐。波多多藝母。許母布佐波受。幣都那美。曾邇奴棄宇豆。夜麻賀多爾。麻岐斯。阿多泥都岐。曾米紀賀斯流邇。斯米許呂母遠。麻都夫佐邇。登理與曾比。淤岐都登理。牟那美流登岐。波多多藝母。許斯與呂志。伊刀古夜能。伊毛能美許登。牟【良/貝】登理能。和賀牟禮伊那婆。比氣登理能。和賀比氣伊那婆。那迦士登波。那波伊布登母。夜麻登能。比登母登須須岐。宇那加夫斯。那賀那加佐麻久。阿佐阿米能。佐疑理邇。多多牟叙。和加久佐能。都麻能美許登。許登能。加多理碁登母。許遠婆。

新字：阿夜爾。那古斐岐許志。夜知富許能。迦微能美許登。許登能。迦多理碁登母。許遠婆。故其夜者不合而。明日夜為御合也。又其神之嫡后須勢理毘売命。甚為嫉妬。故其日子遅神和備豆。（三字以音）自出雲将上坐倭国而。装束立時。片御手者繋御馬之鞍。片御足蹈入其御鐙而。歌曰。奴婆多麻能。久路岐美祁斯遠。麻都夫佐爾。登理与曽比。淤岐都登理。牟那美流登岐。波多多芸母。許礼婆布佐波受。幣都那美。曽邇奴岐宇豆。蘇邇杼理能。阿遠岐美祁斯遠。麻都夫佐邇。登理与曽比。淤岐都登理。牟那美流登岐。波多多芸母。許母布佐波受。幣都那美。曽邇奴棄宇豆。夜麻賀多爾。麻岐斯。阿多泥都岐。曽米紀賀斯流邇。斯米許呂母遠。麻都夫佐邇。登理与曽比。淤岐都登理。牟那美流登岐。波多多芸母。許斯与呂志。伊刀古夜能。伊毛能美許登。牟【良/貝】登理能。和賀牟礼伊那婆。比気登理能。和賀比気伊那婆。那迦士登波。那波伊布登母。夜麻登能。比登母登須須岐。宇那加夫斯。那賀那加佐麻久。阿佐阿米能。佐疑理邇。多多牟叙。和加久佐能。都麻能美許登。許登能。加多理碁登母。許遠婆。

書き下し

あやに　な恋ひ聞こし　八千矛の　神の命　事の　語り言も　こをば。 故、その夜は合はずて、明日の夜御合ひしたまひき。またその神の嫡后（おほきさき）須勢理毘売命、甚（いた）く嫉妬（うはなりねたみ）したまひき。故、その日子遅神（ひこぢのかみ）和備（わび）て、出雲より倭国に上りまさむとして、装束（よそひ）立たす時、片御手は御馬の鞍に繋け、片御足はその御鐙（あぶみ）に蹈み入れて、歌ひたまひしく、 ぬばたまの　黒き御衣（みけし）を　まつぶさに　取り装ひ　沖つ鳥　胸見る時　羽叩（はたた）きも　これは適（ふさ）はず　辺つ波　そに脱き棄（う）て　そに鳥の　青き御衣を　まつぶさに　取り装ひ　沖つ鳥　胸見る時　羽叩きも　これも適はず　辺つ波　そに脱き棄て　山県（やまがた）に　蒔（ま）きし　あたね舂（つ）き　染木（そめき）が汁に　染め衣を　まつぶさに　取り装ひ　沖つ鳥　胸見る時　羽叩きも　此（こ）し宜（よろ）し　いとこやの　妹の命　群鳥（むらどり）の　我が群れ往なば　引け鳥の　我が引け往なば　泣かじとは　汝は言ふとも　山処（やまと）の　一本薄（ひともとすすき）　項傾（うなかぶ）し　汝が泣かさまく　朝雨の　霧に立たむぞ　若草の　妻の命　事の　語り言も　こをば。