古事記 ／ 上巻・沼河比売への求婚の歌

此八千矛神。將婚高志國之沼河比賣。幸行之時。到其沼河比賣之家。歌曰。夜知富許能。迦微能美許登波。夜斯麻久爾。都麻麻岐迦泥豆。登富登富斯。故志能久邇邇。佐加志賣遠。阿理登岐加志豆。久波志賣遠。阿理登伎許志豆。佐用婆比邇。阿理多多斯。用婆比邇。阿理加用婆勢。多知賀遠母。伊麻陀登加受豆。淤須比遠母。伊麻陀登加泥婆。遠登賣能。那須夜伊多斗遠。於曾夫良比。和何多多勢禮婆。比許豆良比。和何多多勢禮婆。阿遠夜麻邇。奴延波那伎。佐怒都登理。岐藝斯波登與牟。爾波都登理。迦祁波那久。宇禮多久母。那久那留登理加。許能登理母。宇知夜米許世泥。伊斯多布夜。阿麻波勢豆加比。許登能。加多理碁登母。許遠婆。爾其沼河日賣。未閉戶。自內歌曰。夜知富許能。迦微能美許等。怒延久佐能。賣邇志阿禮婆。和何許許呂。宇良須能登理叙。伊麻許曾婆。知杼理邇阿羅米。能知波。那杼理邇阿羅牟遠。伊能知波。那志勢多麻比曾。伊斯多布夜。阿麻波世豆迦比。許登能。加多理碁登母。許遠婆。阿遠夜麻邇。比賀迦久良婆。奴婆多麻能。用波伊傳那牟。阿佐比能。惠美佐迦延來而。多久豆怒能。斯路岐多陀牟岐。阿和由岐能。和加夜流牟泥遠。曾陀多岐。多多岐麻那賀理。麻多麻傳。多麻傳佐斯麻岐。毛毛那賀爾。伊波那佐牟遠。

新字：此八千矛神。将婚高志国之沼河比売。幸行之時。到其沼河比売之家。歌曰。夜知富許能。迦微能美許登波。夜斯麻久爾。都麻麻岐迦泥豆。登富登富斯。故志能久邇邇。佐加志売遠。阿理登岐加志豆。久波志売遠。阿理登伎許志豆。佐用婆比邇。阿理多多斯。用婆比邇。阿理加用婆勢。多知賀遠母。伊麻陀登加受豆。淤須比遠母。伊麻陀登加泥婆。遠登売能。那須夜伊多斗遠。於曽夫良比。和何多多勢礼婆。比許豆良比。和何多多勢礼婆。阿遠夜麻邇。奴延波那伎。佐怒都登理。岐芸斯波登与牟。爾波都登理。迦祁波那久。宇礼多久母。那久那留登理加。許能登理母。宇知夜米許世泥。伊斯多布夜。阿麻波勢豆加比。許登能。加多理碁登母。許遠婆。爾其沼河日売。未閉戸。自内歌曰。夜知富許能。迦微能美許等。怒延久佐能。売邇志阿礼婆。和何許許呂。宇良須能登理叙。伊麻許曽婆。知杼理邇阿羅米。能知波。那杼理邇阿羅牟遠。伊能知波。那志勢多麻比曽。伊斯多布夜。阿麻波世豆迦比。許登能。加多理碁登母。許遠婆。阿遠夜麻邇。比賀迦久良婆。奴婆多麻能。用波伊伝那牟。阿佐比能。恵美佐迦延来而。多久豆怒能。斯路岐多陀牟岐。阿和由岐能。和加夜流牟泥遠。曽陀多岐。多多岐麻那賀理。麻多麻伝。多麻伝佐斯麻岐。毛毛那賀爾。伊波那佐牟遠。

書き下し

この八千矛神、高志国の沼河比売を婚（よば）はむとして、幸（い）でまして行きし時、その沼河比売の家に到りて、歌ひたまひしく、 八千矛（やちほこ）の　神の命（みこと）は　八島国　妻枕（つままき）かねて　遠遠し　高志の国に　賢（さか）し女（め）を　有りと聞かして　麗（くは）し女を　有りと聞こして　さ婚（よば）ひに　あり立たし　婚ひに　あり通はせ　太刀が緒も　いまだ解かずて　襲（おすひ）をも　いまだ解かねば　乙女の　寝（な）すや板戸を　押そぶらひ　我が立たせれば　引こづらひ　我が立たせれば　青山に　鵺（ぬえ）は鳴き　さ野つ鳥　雉（きぎし）は響（とよ）む　庭つ鳥　鶏（かけ）は鳴く　うれたくも　鳴くなる鳥か　この鳥も　打ち止めこせね　いしたふや　天馳使（あまはせづかひ）　事の　語り言も　こをば。 ここにその沼河日売、いまだ戸を開かずて、内より歌ひたまひしく、 八千矛の　神の命　萎（ぬ）え草の　女（め）にしあれば　我が心　浦渚（うらす）の鳥ぞ　今こそは　我鳥（わどり）にあらめ　後は　汝鳥（などり）にあらむを　命（いのち）は　な殺（し）せたまひそ　いしたふや　天馳使　事の　語り言も　こをば。　青山に　日が隠らば　ぬばたまの　夜は出でなむ　朝日の　笑み栄え来て　栲綱（たくづの）の　白き腕（ただむき）　沫雪の　若（わか）やる胸を　そだたき　たたきまながり　真玉手　玉手さし枕（ま）き　百長に　寝（い）は寝（な）さむを　あやに　な恋ひ聞こし　八千矛の　神の命　事の　語り言も　こをば。