古事記 ／ 下巻・天語歌と三つの歌

故獻此歌者。赦其罪也。爾大后歌其歌曰。夜麻登能。許能多氣知爾。古陀加流。伊知能都加佐。爾比那閇夜爾。淤斐陀豆流。波毘呂。由都麻都婆岐。曾賀波能。比呂理伊麻志。曾能波那能。豆理伊麻須。多加比加流。比能美古爾。登余美岐。多豆麻都良勢。許登能。加多理碁登母。許袁婆。即天皇歌曰。毛毛志紀能。淤富美夜比登波。宇豆良登理。比禮登理加氣豆。麻那婆志良。袁由岐阿閇。爾波須受米。宇受須麻理韋豆。祁布母加母。佐加美豆久良斯。多加比加流。比能美夜比登。許登能。加多理碁登母。許袁婆。此三歌者。天語歌也。故於此豐樂。譽其三重婇而。給多祿也。是豐樂之日。亦春日之袁杼比賣。獻大御酒之時。天皇歌曰。美那曾曾久。淤美能袁登賣。本陀理登良須母。本陀理尋理。加多久尋良勢。斯多賀多久。夜賀多久尋良勢。本陀理尋良須古。此者宇岐歌也。

新字：故献此歌者。赦其罪也。爾大后歌其歌曰。夜麻登能。許能多気知爾。古陀加流。伊知能都加佐。爾比那閇夜爾。淤斐陀豆流。波毘呂。由都麻都婆岐。曽賀波能。比呂理伊麻志。曽能波那能。豆理伊麻須。多加比加流。比能美古爾。登余美岐。多豆麻都良勢。許登能。加多理碁登母。許袁婆。即天皇歌曰。毛毛志紀能。淤富美夜比登波。宇豆良登理。比礼登理加気豆。麻那婆志良。袁由岐阿閇。爾波須受米。宇受須麻理韋豆。祁布母加母。佐加美豆久良斯。多加比加流。比能美夜比登。許登能。加多理碁登母。許袁婆。此三歌者。天語歌也。故於此豊楽。誉其三重婇而。給多禄也。是豊楽之日。亦春日之袁杼比売。献大御酒之時。天皇歌曰。美那曽曽久。淤美能袁登売。本陀理登良須母。本陀理尋理。加多久尋良勢。斯多賀多久。夜賀多久尋良勢。本陀理尋良須古。此者宇岐歌也。

書き下し

故、この歌を献りしかば、その罪を赦したまひき。爾に大后、その歌を歌ひたまひき。その歌に曰はく、「倭の　この高市に　小高る　市の高処　新嘗屋に　生ひ立てる　葉広　斎つ真椿　そが葉の　広り坐し　その花の　照り坐す　高光る　日の御子に　豊御酒　献らせ　事の　語り言も　こをば」。即ち天皇の歌ひたまひしく、「ももしきの　大宮人は　鶉鳥　領巾取り懸けて　鶺鴒　尾行き合へ　庭雀　うずすまり居て　今日もかも　酒みづくらし　高光る　日の宮人　事の　語り言も　こをば」。この三つの歌は、天語歌なり。故、この豊楽に、その三重の婇を誉めて、多禄を給ひき。この豊楽の日に、亦、春日の袁杼比売、大御酒を献りし時、天皇の歌ひたまひしく、「みなそそく　臣の乙女　ほだり取らすも　ほだり持ち　堅く取らせ　下堅く　弥堅く取らせ　ほだり取らす子」。これは宇岐歌なり。