古事記 ／ 下巻・三重の采女と百枝槻

故作御歌。其御歌曰。袁登賣能。伊加久流袁加母。加那須岐母。伊本知母賀母。須岐婆奴流母能。故號其岡。謂金鉏岡也。又天皇坐長谷之百枝槻下。爲豐樂之時。伊勢國之三重婇。指擧大御盞以獻。爾其百枝槻葉落。浮於大御盞。其婇不知落葉浮於盞。猶獻大御酒。天皇看行其浮盞之葉。打伏其婇。以刀刺充其頸。將斬之時。其婇白天皇曰。莫殺吾身。有應白事。即歌曰。麻岐牟久能。比志呂乃美夜波。阿佐比能。比傳流美夜。由布比能。比賀氣流美夜。多氣能泥能。泥陀流美夜。許能泥能。泥婆布美夜、夜本爾余志。伊岐豆岐能美夜。麻紀佐久。比能美加度。爾比那閇夜爾。淤斐陀豆流。毛毛陀流。都紀賀延波。本都延波。阿米袁淤幣理。那加都延波。阿豆麻袁淤幣理。志豆延波。比那袁淤幣理。本都延能。延能宇良婆波。那加都延爾。淤知布良婆閇。那加都延能。延能宇良婆波。斯毛都延爾。淤知布良婆閇。斯毛都延能。延能宇良婆波。阿理岐奴能。美幣能古賀。佐佐賀世流。美豆多麻宇岐爾。宇岐志阿夫良。淤知那豆佐比。美那許袁呂。許袁呂爾。許斯母。阿夜爾加志古志。多加比加流。比能美古。許登能。加多理碁登母。許袁婆。

新字：故作御歌。其御歌曰。袁登売能。伊加久流袁加母。加那須岐母。伊本知母賀母。須岐婆奴流母能。故号其岡。謂金鉏岡也。又天皇坐長谷之百枝槻下。為豊楽之時。伊勢国之三重婇。指挙大御盞以献。爾其百枝槻葉落。浮於大御盞。其婇不知落葉浮於盞。猶献大御酒。天皇看行其浮盞之葉。打伏其婇。以刀刺充其頸。将斬之時。其婇白天皇曰。莫殺吾身。有応白事。即歌曰。麻岐牟久能。比志呂乃美夜波。阿佐比能。比伝流美夜。由布比能。比賀気流美夜。多気能泥能。泥陀流美夜。許能泥能。泥婆布美夜、夜本爾余志。伊岐豆岐能美夜。麻紀佐久。比能美加度。爾比那閇夜爾。淤斐陀豆流。毛毛陀流。都紀賀延波。本都延波。阿米袁淤幣理。那加都延波。阿豆麻袁淤幣理。志豆延波。比那袁淤幣理。本都延能。延能宇良婆波。那加都延爾。淤知布良婆閇。那加都延能。延能宇良婆波。斯毛都延爾。淤知布良婆閇。斯毛都延能。延能宇良婆波。阿理岐奴能。美幣能古賀。佐佐賀世流。美豆多麻宇岐爾。宇岐志阿夫良。淤知那豆佐比。美那許袁呂。許袁呂爾。許斯母。阿夜爾加志古志。多加比加流。比能美古。許登能。加多理碁登母。許袁婆。

書き下し

故、御歌を作りたまひき。その御歌に曰はく、「袁登賣の　い隠る岡を　金鋤も　五百箇もがも　鋤き撥ぬるもの」。故、その岡を号けて、金鉏岡と謂ふ。又、天皇、長谷の百枝槻の下に坐して、豊楽したまひし時、伊勢国の三重の婇、大御盞を指し挙げて献りき。爾にその百枝槻の葉落ちて、大御盞に浮かびき。その婇、落葉の盞に浮かべるを知らずて、猶し大御酒を献りき。天皇、その盞に浮かべる葉を看行はして、その婇を打ち伏せ、刀を以ちてその頸に刺し充てて、斬らむとしたまふ時、その婇、天皇に白して曰さく、「吾が身を殺したまふこと莫かれ。白すべき事あり」とまをして、即ち歌ひて曰はく、「纏向の　日代の宮は　朝日の　日照る宮　夕日の　日影る宮　竹の根の　根垂る宮　木の根の　根蔓ふ宮　八百土よし　い築きの宮　真木栄く　檜の御門　新嘗屋に　生ひ立てる　百足る　槻が枝は　上つ枝は　天を覆へり　中つ枝は　東を覆へり　下枝は　鄙を覆へり　上つ枝の　枝の末葉は　中つ枝に　落ち触らばへ　中つ枝の　枝の末葉は　下枝に　落ち触らばへ　下枝の　枝の末葉は　あり衣の　三重の子が　捧がせる　瑞玉盞に　浮きし脂　落ち水押ひ　水こをろこをろに　これしも　あやに畏し　高光る　日の御子　事の　語り言も　こをば」。