古事記 ／ 下巻・衣通王の追慕と心中

故後。亦不堪戀慕而。追往時。歌曰。岐美賀由岐。氣那賀久那理奴。夜麻多豆能。牟加閇袁由加牟。麻都爾波麻多士。（此云山多豆者。是今造木者也。）故追到之時。待懷而。歌曰。許母理久能。波都世能夜麻能。意富袁爾波。波多波理陀豆。佐袁袁爾波。波多波理陀豆。意富袁爾斯。那加佐陀賣流。淤母比豆麻。阿波禮。都久由美能。許夜流許夜理母。阿豆佐由美。多豆理多豆理母。能知母登理美流。意母比豆麻。阿波禮。又歌曰。許母理久能。波都勢能賀波能。賀美都勢爾。伊久比袁宇知。斯毛都勢爾。麻久比袁宇知。伊久比爾波。加賀美袁加氣。麻久比爾波。麻多麻袁加氣。麻多麻那須。阿賀母布伊毛。加賀美那須。阿賀母布都麻。阿理登。伊波婆許曾爾。伊幣爾母由加米。久爾袁母斯怒波米。如此歌。即共自死。

新字：故後。亦不堪恋慕而。追往時。歌曰。岐美賀由岐。気那賀久那理奴。夜麻多豆能。牟加閇袁由加牟。麻都爾波麻多士。（此云山多豆者。是今造木者也。）故追到之時。待懐而。歌曰。許母理久能。波都世能夜麻能。意富袁爾波。波多波理陀豆。佐袁袁爾波。波多波理陀豆。意富袁爾斯。那加佐陀売流。淤母比豆麻。阿波礼。都久由美能。許夜流許夜理母。阿豆佐由美。多豆理多豆理母。能知母登理美流。意母比豆麻。阿波礼。又歌曰。許母理久能。波都勢能賀波能。賀美都勢爾。伊久比袁宇知。斯毛都勢爾。麻久比袁宇知。伊久比爾波。加賀美袁加気。麻久比爾波。麻多麻袁加気。麻多麻那須。阿賀母布伊毛。加賀美那須。阿賀母布都麻。阿理登。伊波婆許曽爾。伊幣爾母由加米。久爾袁母斯怒波米。如此歌。即共自死。

書き下し

故、後にまた恋ひ慕ひるに堪へずして、追ひ往く時、歌ひて曰く、「君が行き 日長くなりぬ 山たづの 迎へを行かむ 待つには待たじ」。(ここに山多豆と云ふは、今の造木なり。)故、追ひ到りし時、待ち懐ひて、歌ひて曰く、「隠り国の 泊瀬の山の 大峰には 幡張り立て さ小峰には 幡張り立て 大峰にし 中定める 思ひ妻 あはれ 槻弓の 臥やる臥やりも 梓弓 立てり立てりも 後も取り見る 思ひ妻 あはれ」。また歌ひて曰く、「隠り国の 泊瀬の川の 上つ瀬に 斎杭を打ち 下つ瀬に 真杭を打ち 斎杭には 鏡を掛け 真杭には 真玉を掛け 真玉なす 吾が思ふ妹 鏡なす 吾が思ふ妻 ありと言はばこそに 家にも行かめ 国をも偲はめ」。かく歌ひて、即ち共に自ら死にたまひき。