古事記 ／ 下巻・赤猪子の八十年

爾令詔者。汝不嫁夫。今將喚而。還坐於宮。故其赤猪子。仰待天皇之命。既經八十歳。於是。赤猪子以爲。望命之間。已經多年。姿體痩萎。更無所恃。然非顯待情。不忍於悒而。令持百取之机代物。參出貢獻。然天皇既忘先所命之事。問其赤猪子曰。汝者誰老女。何由以參來。爾赤猪子答白。其年其月。被天皇之命。仰待大命。至于今日。經八十歳。今容姿既耆。更無所恃。然顯白己志。以參出耳。於是。天皇大驚曰。吾既忘先事。然汝守志待命。徒過盛年。是甚愛悲。心裏欲婚。憚其極老。不得成婚而。賜御歌。其歌曰。美母呂能。伊都加斯賀母登。由由斯伎加母。加志波良袁登賣。又歌曰。比氣多能。和加久流須婆良。和加久閇爾。韋泥豆麻斯母能。淤伊爾祁流加母。

新字：爾令詔者。汝不嫁夫。今将喚而。還坐於宮。故其赤猪子。仰待天皇之命。既経八十歳。於是。赤猪子以為。望命之間。已経多年。姿体痩萎。更無所恃。然非顕待情。不忍於悒而。令持百取之机代物。参出貢献。然天皇既忘先所命之事。問其赤猪子曰。汝者誰老女。何由以参来。爾赤猪子答白。其年其月。被天皇之命。仰待大命。至于今日。経八十歳。今容姿既耆。更無所恃。然顕白己志。以参出耳。於是。天皇大驚曰。吾既忘先事。然汝守志待命。徒過盛年。是甚愛悲。心裏欲婚。憚其極老。不得成婚而。賜御歌。其歌曰。美母呂能。伊都加斯賀母登。由由斯伎加母。加志波良袁登売。又歌曰。比気多能。和加久流須婆良。和加久閇爾。韋泥豆麻斯母能。淤伊爾祁流加母。

書き下し

ここに令詔りたまひしく、「汝は夫に嫁はざれ。今喚してむ」とのりたまひて、宮に還り坐しき。故、その赤猪子、天皇の命を仰ぎ待ちて、既に八十歳を経たり。ここに赤猪子以為へらく、「命を望ぎし間に、已に多くの年を経て、姿体痩せ萎みて、更に恃む所無し。然れども待てる情を顕さずは、悒きに忍びじ」とおもひて、百取の机代の物を持たしめて、参ゐ出でて貢献りき。然れども天皇、既に先に命ぜしことを忘れて、その赤猪子に問ひて曰く、「汝は誰が老女ぞ。何の由にか参ゐ来し」とのりたまひき。ここに赤猪子、答へて白さく、「その年その月、天皇の命を被りて、大命を仰ぎ待ちて、今日に至るまで八十歳を経たり。今は容姿既に耆いて、更に恃む所無し。然れども己が志を顕し白さむとして、参ゐ出でしのみ」とまをしき。ここに天皇、大きに驚きて曰く、「吾は既に先のことを忘れき。然れども汝は志を守り命を待ちて、徒に盛りの年を過ぐしつ。これ甚愛しく悲し」とのりたまひて、心の裏に婚はむと欲ひたまへども、その極めて老いたるを憚りて、婚ひを成すこと得ずして、御歌を賜ひき。その歌に曰く、「みもろの 厳白檮が下 ゆゆしきかも 白檮原嬢子」。また歌ひて曰く、「引田の 若栗栖原 若くへに 率寝てましもの 老いにけるかも」。