第六十一代、朱雀天皇。諱は寛明、醍醐十一の子。御母皇太后藤原穏子、関白太政大臣基経の女也。御兄保明の太子早世、その御子慶頼の太子もうちつゞきかくれましゝかば、保明一腹の御弟にて立給。庚寅年即位、辛卯に改元。外舅左大臣忠平摂政せらる。寛平に昭宣公薨てのちには、延喜御一代まで摂関なかりき。此君又幼主にて立給によりて、故事にまかせて万機を摂行せられけるにこそ。此御時、平の将門と云物あり。上総介高望が孫也。執政の家につかうまつりけるが、使の宣旨を望申けり。不許なるによりいきどほりをなし、東国に下向して叛逆をおこしけり。まづ伯父常陸の大掾国香をせめしかば、国香自殺しぬ。これより坂東をゝしなびかし、下総国相馬郡に居所をしめ、都となづけ、みづから平親王と称し、官爵をなしあたへけり。これによりて天下騒動す。参議民部卿兼右衛門督藤原忠文朝臣を征東大将軍とし、源経基・藤原仲舒を副将軍としてさしつかはさる。

平貞盛・藤原秀郷等心を一にして、将門をほろぼして其首を奉りしかば、諸将は道よりかへりまゐりにき。藤原純友と云物、かの将門に同意して西国にて叛乱せしかば、少将小野好古を遣て追討せらる。かくて天下しづまりにき。延喜の御代さしも安寧なりしに、いつしか此乱出来る。天皇もおだやかにましましけり。又貞信公の執政なりしかば、政たがふことははべらじ。時の災難にこそとおぼえ侍る。天皇御子ましまさず。一腹の御弟太宰帥の親王を太弟にたてゝ、天位をゆづりて尊号あり。後に出家せさせ給。天下を治給こと十六年。三十歳おましましき。

六十一代〔將門純友が事。この時なり。〕次の御門朱雀院天皇と申しき。御諱ひろあきら。これ醍醐の御門の御十一の王子なり。御母皇太后宮穩子と申しき。太政大臣基經のおとゞの四つの娘なり。このみかど延長元年癸未四月廿七日生れさせ給ふ。同三年乙酉十月廿一日東宮に立ち給ふ。御年三歲。同八年庚寅九月廿二日位に即かせ給ふ。御年八歲。承平七年正月四日御元服。御年十五。世を保たせ給ふ事十六年。〔或本に廿四にて御すけ、天曆六年八月十五日うせ給ふとあり。御とし三十七、陵鳥邊野にあり。〕八幡の臨時の祭はこの御時よりあるぞかし。この御門生れさせ給ひては御格子もまゐらず夜晝火をともして御帳の內にて三つまでおほし奉らせ給ひき。北野におぢ申させ給ひてかくありしぞかし。この御門生れおはしまさずば藤氏のさかえいとかうしもおはしまさゞらまし。いみじきをりふし生れさせ給へりしぞかし。位に即かせ給ひて、將門がみだれ出できて、御願にてぞと聞え侍りし、この臨時の祭は。そのづま遊の歌、貫之のぬしのよみたりし、「松もおひまたもかげさすいはしみづゆくすゑとほくつかへまつらむ」。六十二代〔天曆聖主此也。殿上有和歌會。〕次の御門、村上の天皇と申しき。御諱なりあきら。これ醍醐の御門の第十四の皇子なり。御母后朱雀院の御同じ腹におはします。この御門、延長四年丙戌六月二日生れさせ給ふ。〔桂芳坊にて生れさ〕〔せ給へるとぞ。〕天慶三年庚子二月十五日御元服。御年十五。同七年甲辰四月廿二日に東宮に立たせ給ふ。御年十九。同九年丙午四月廿九日位に即かせ給ふ。御年二十一。世をしらせ給ふ事廿一年。〔ある本に庚保四年五月廿五日うせさせ給ふ。御年四十二。御陵村上。〕御母后、延喜三年癸亥前坊うまれさせ給ふ。御年十九。同廿年女御の宣旨下りたまふ。御年三十六。同廿三年みづのとのひつじ朱雀院生れさせ給ふ。

第六十九代、第三十七世、後朱雀院。諱は敦良、後一条同母の弟也。丙子年即位、丁丑に改元。天皇賢明にましましけるとぞ。されど其比執柄権をほしきまゝにせられしかば、御政のあときこえず。無念なることにや。長久の比内裏に火ありて、神鏡焼給。猶霊光を現じ給ければその灰をあつめて安置せられき。天下を治給こと九年。三十七歳おましましき。 ○第七十代、後冷泉院。諱は親仁、後朱雀第一の子。御母贈皇太后藤原嬉子、摂政道長のおとゞ第三の女なり。乙酉年即位、丙戌改元。此御代のすゑつかた、世の中やすからずきこえき。陸奥にも貞任・宗任など云し者、国をみだりければ、源頼義に仰て追討せらる。十二年ありてなむしづめ侍ける。此君御子ましまさざりし上、後朱雀の遺詔にて、後三条東宮にゐ給へりしかば、継体はかねてよりさだまりけるにこそ。天下を治給こと二十三年。四十四歳おましましき。

諱寛明。延長八年九月廿二日受禪。〔八。〕同三年月日立坊。醍醐天皇第十一御子。承平七年正月四日御元服。〔十五。〕母皇太后藤原穩子。〔昭宣公四女。〕攝政太政大臣藤忠平。〔受禪同日攝政詔。承平六年八月十九日任太政大臣。天慶四年十月廿日辭攝政。同十一月爲關白。〕右大臣藤實賴。〔忠平長男。天慶七年四月九日任。〕承平七年。〔元年辛卯〕。四月廿六日改元。元年七月十九日宇多院崩御。〔六十五。〕天慶九年。〔元年戊戌〕。五月廿三日改元。山座主權律師義海。〔少僧都。天慶三年三月廿五日宣命。六十八。治五年。同九年五月十日卒。七十四。〕權律師延昌。〔僧正。諡號慈念。同九年十二月廿日宣命。六十七。治十八年。應和四年正月十五日卒。八十五。〕賀茂社行幸此御時始マレリ。石淸水臨時祭始マレリ。將門純友謀反事。平貞盛橘遠保等討テ奉ル。叡山根本中堂燒亡。天慶九年四月脫屣。天曆六年八月十五日崩御。〔三十。〕女御后二人。姬宮二人。諱成明。天曆御門ト申。天慶九年四月十三日受禪。〔廿一。〕同七年月日立坊。〔十九。〕醍醐十四子。天慶三年十月一日御元服。〔十五。〕御母朱雀院同母。關白太政大臣忠平。〔天慶九年五月廿日關白准三宮。天曆三年正月廿一日賜度者五十人。又修諷誦於十五大寺。爲救大臣之病也。八月八日臥病不起。十四日詔賜度者三十〕〔人。又大赦天下。爲救病也。是日薨。戊刻。七十。十八日詔遣中納言藤原元方。參議源庶明等。就北極前賜正一位。封信濃國爲信濃公。諡曰貞信公。〕左大臣實賴。〔忠平一男。左大將。天曆元年四月廿六日任左大臣。天德元年三月廿一日辭大將。四月五日勅授帶劍。同三年三月日聽輦車。〕右大臣師輔。〔同二男。右大將。天曆元年四月廿六日任。同九年六月十七日辭大將。七月廿二日勅授帶劍。天德四年五月二日出家。五十三。同四日薨。在官十四年。〕天曆十年。〔元年丁未〕。四月廿四日改元。三年九月廿九日陽成院崩御。〔八十一。〕六年八月十五日朱雀院崩御。〔三十。〕天德四年。〔元年丁巳〕。十月廿七日改元。應和三年。〔元年辛酉〕。二月十六日改元。康保四年。〔元年甲子〕。七月十日改元。天皇四年五月廿五日崩御。〔四十二。〕山座主權大僧都鎭朝。〔入道云々。俗名橘高彭。應和四年三月九日宣命。七十九。治七ケ年。同十月五日卒。〕權少僧都喜慶。〔康保二年三月十五日宣命。七十七。治一年。同三年七月十七日卒。〕權律師良源。〔法務大僧正。諡號慈惠。同三年八月廿七日宣命。五十六。治十九年。永觀三年正月三日御遷化。七十五。〕天德四年九月廿三日大内燒亡。都遷ノ後始テ燒亡云々。内侍所ノ温明殿ノ灰ノ中ニ。御躰神鏡少モ損給ハデヲハシマシクレバ。翌日ノ朝ニ職曹司ニ移シマイラセテ。内藏寮奉幣アリクリ。或ハ大乘椋木ニ飛出テ懸リ給フナドモ云ナリ。其日記ハタシカナラヌニヤ。康保四年五月廿五日崩。〔四十二。〕后女御十人。男女御子十九人。天曆三年以後。此御時一代無關白。小野宮九條殿爲左右大臣被行政。

諱敦良。長元九年四月十七日〔乙丑〕受禪。〔廿八。〕寛仁元年月日立坊。〔九。〕一條院第三子。寛仁三年八月廿八日御元服。〔十一。〕母上東門院。關白左大臣賴通。右大臣藤實資。〔右大將。〕内大臣藤敎通。〔左大將。〕長曆三年。〔元年丁丑。〕四月廿一日改元。長久四年。〔元年庚辰。〕十一月十日改元。寛德二年。〔元年甲申。〕十一月廿四日改元。二年正月十八日崩御。〔卅七。〕山座主權大僧都敎圓。〔長曆三年三月十二日宣命。六十一。治九年。永承二年六月十日卒。七十。〕寛德二年正月十六日脫屣。后五人。御子七人。諱親仁。寛德二年正月十六日受禪。〔廿一。〕長曆元年八月十七日立坊。〔十三。〕後朱雀院第一子。長曆元年七月二日御元服。〔十三。〕母内侍督嬉子。〔御堂之乙女。〕后三人。御子オハシマサズ。關白太政大臣賴通。〔康平五年九月二日辭太政大臣。同七年十二月十三日讓藤氏長者於左大臣。猶爲關白。治曆三年十月七日准三宮。同年十二月五日辭關白。延久四年正月廿〕〔九日於宇治出家。法名寂覺。八十一。大臣後五十六年。同六年二月二日薨。八十三。〕關白左大臣敎通。〔康平三年七月任左大臣。同七年十二月十三日爲藤氏長者。治曆四年四月十六日爲關白。〕右大臣實資。〔永承元年正月十八日薨。九十。〕右大臣賴宗。〔右大將。康平三年七月十七日任。治曆元年正月五日依病出家。七十三。二月三日薨。〕右大臣師實。〔左大將。康平三年七月十七日任內大臣。十九。治曆元年六月三日轉右。〕内大臣師房。〔右大將。具平親王三男。治曆元年六月三日任。五十八。同六日兼右大將。〕永承七年。〔元年丙戌。〕四月十四日改元。天喜五年。〔元年癸巳。〕正月十一日改元。康平七年。〔元年戊戌。〕八月廿九日改元。治曆四年。〔元年乙巳。〕八月二日改元。四年四月十九日天皇崩御。〔四十四。〕山座主法務大僧正明尊。〔永承三年八月十一日宣命。七十八。〕權少僧都源心。〔權大僧都。同三年八月廿一日宣命。七十八。治五年。天喜元年十月十一日卒。八十三。〕權僧正源泉。〔天喜元年十月廿六日宣命。七十八。〕權大僧都明快。〔大僧正。天喜元年十月廿九日宣命。六十七。治十七年。〕

第五十一代、平城天皇は桓武第一の子。御母皇太后藤原の乙牟漏、贈太政大臣良継の女也。丙戌年即位、改元。平安宮にまします。天下を治給こと四年。太弟にゆづりて太上天皇と申。平城の旧都にかへりてすませ給けり。尚侍藤原の薬子を寵ましけるに、其弟参議右兵衛督仲成等申すゝめて逆乱の事ありき。田村丸を大将軍として追討せられしに、平城の軍やぶれて、上皇出家せさせ給。御子東宮高岡の親王もすてられて、おなじく出家、弘法大師の弟子になり、真如親王と申はこれなり。薬子・仲成等誅にふしぬ。上皇五十一歳までおましましき。